Canal INEGA

Suscribirse a canal de noticias Canal INEGA
RSS de las noticias de Inega
Actualizado: Hace 1 hora 5 mins

A XUNTA SINALA A APOSTA POLO HIDRÓXENO VERDE COMO CLAVE PARA A TRANSICIÓN ENERXÉTICA

Vie, 09/16/2022 - 12:39

- O director xeral de Planificación Enerxética e Recursos Naturais, Pablo Fernández Vila, participou na apertura dunha xornada sobre hidróxeno renovable e almacenamento organizada polo Clúster de Enerxías Renovables de Galicia (Cluergal).
 - Subliña que o hidróxeno ocupa un papel central na Axenda Enerxética de Galicia, xa que vai contribuír a diminuír a dependencia do exterior.

Santiago de Compostela, 16 de setembro de 2022 - O director xeral de Planificación Enerxética e Recursos Naturais, Pablo Fernández Vila, participou esta mañá mediante videoconferencia na apertura dun encontro sobre hidróxeno renovable e almacenamento organizado polo Clúster de Enerxías Renovables de Galicia (Cluergal). Na súa intervención, o director xeral apuntou que, ao permitir o almacenamento da enerxía, o hidróxeno é un vector que xogará un papel fundamental no actual proceso de transición enerxética.
 
Neste sentido, subliñou que na Axenda Enerxética de Galicia o hidróxeno ocupa un lugar central, xa que vai contribuír a diminuír a dependencia enerxética do exterior. Nesta folla de ruta, coa que se camiña cara a un modelo sostible e un novo mix enerxético, impulsando tecnoloxías como os gases renovables, a eólica mariña, ademais do hidróxeno verde e o almacenamento enerxético, tamén se recolle a creación dun hub co obxectivo de aproveitar a oportunidade que supón o hidróxeno verde e alcanzar os 500MW instalados en 2030.
 
Fernández Vila, que lembrou que a Unión Europea estableceu como un dos piares do plan REPowerEU diversificar as subministracións de gas mediante, entre outras medidas, unha maior presenza de biometano e de hidróxeno, apuntou que a produción a través de renovables fai preciso desenvolver sistemas de acumulación de enerxía, permitindo o seu uso en función das necesidades da demanda, e é aí onde destaca o hidróxeno.
 
O director xeral de Planificación Enerxética e Recursos Naturais destacou tamén os mecanismos normativos que se están habilitando desde a Xunta de Galicia para favorecer os acordos de subministración de enerxía por parte de promotores de renovables da industria galega, garantindo por un lado un prezo competitivo da enerxía, e por outro, que esta sexa enerxía limpa.

Categorías: Noticias

A XUNTA DUPLICA OS FONDOS DESTINADOS A APOIAR PROXECTOS DE AUTOCONSUMO E DE ENERXÍAS RENOVABLES

Lun, 08/01/2022 - 11:50

- O Diario Oficial de Galicia publica hoxe as ampliacións concedidas a través dos fondos europeos, coas que a Xunta conta con 74M€.
- Con estas axudas, cuxo prazo de presentación de solicitudes permanecerá aberto ata 2023, prevese acadar aforros de 40M€ ao ano nas facturas enerxéticas de fogares, empresas e administracións.
- Estes programas van en liña co Plan de medidas para o aforro e a eficiencia enerxética impulsado pola Administración autonómica.

Santiago de Compostela, 1 de agosto de 2022- O Diario Oficial de Galicia publica hoxe a ampliación do orzamento das convocatorias de axudas dirixidas a proxectos de autoconsumo eléctrico e almacenamento con enerxías renovables, así como da liña para proxectos de enerxías renovables térmicas no sector residencial, que duplican o seu orzamento inicial ata alcanzar os preto de 74M€.

Con estas axudas, procedentes dos fondos europeos e incluídas no Plan de Recuperación, Transformación e Resiliencia, o Goberno galego prevé unha mobilización de 225M€, así como aforros de 40M€ ao ano nas facturas enerxéticas de empresas, administracións e fogares.

O prazo para a solicitude dos apoios, de concorrencia non competitiva, permanecerá aberto ata 2023. Ata o momento, a administración autonómica xa aprobou 646 iniciativas que contribúen a impulsar medidas de aforro e eficiencia. Inclúense varias liñas dirixidas a fomentar o autoconsumo e almacenamento enerxético en empresas, por unha parte, e en fogares, administracións públicas e entidades sen ánimo de lucro, por outra. Tamén se recolle unha convocatoria de renovables térmicas no sector residencial.

As axudas responden á aposta da Xunta de Galicia por apoiar o desenvolvemento das enerxías renovables en todos os ámbitos da Comunidade, así como impulsar o autoconsumo, obxectivos recollidos na Axenda Enerxética de Galicia 2030 e que tamén van en liña co Plan de medidas para o aforro e a eficiencia enerxética en fogares, administracións públicas e empresas impulsado pola Administración autonómica.

A Xunta segue, pois, comprometida co impulso dunha Galicia máis verde, fomentando o uso de enerxías renovables entre todo tipo de usuarios -fogares, empresas e administracións- co obxectivo de avanzar na transición ecolóxica. Estes apoios contribuirán á redución dos custos enerxéticos dos beneficiarios, nun momento de continua escalada de prezos na factura da luz que teñen que pagar familias e empresas; ademais da creación de emprego, a reactivación económica e a mellora ambiental que repercute na calidade de vida dos cidadáns.

Categorías: Noticias